بسم الله الرحمن الرحيم
السلام عليكم ورحمة الله وبركاتة صفصوفاتى الغالين
طبعا انا عملت مواضيع كتير واكلات من مطبخ بوسى المدلع ومكنتش ناوية انزل حاجة العيد بتاعتى السنة دى بس بنائا على رغبة الجماهير هههههههه قلت اكمل بقى مع حاجة العيد بتاعتى ندخل بقى فى الموضوع
اولا كحك العيد \\\\\\\
كيلو دقيق + ذرة ملح
نص كيلو سمن ساخن جدا ( فى ناس بتعمل السمن بدرجة حرارة المطبخ براحتكم بس انا بفضل الطريقة دى لانها اطعم والله وعن تجربة+ ملعقتين كبار سمسم محمص +
قطعة خميرة مذابة فى ثلاثة تربع كوب ماء دافىء بملعقة سكر
ملعقة صغيرة بكنج بودر + ملعقة ريحة الكحك ودى اختيارى بصراحة انا مش بحبها
الطريقة \\\\\\\\\\\\
ننخل الدقيق ونضيف عليه ذرة الملح والبكنج بودر
نعمل حفرة فى الوسط ونضع فيها السمسم
نقدح السمن ونضيفة ونقلب بملعقة خشب الى ان يبرد العجين ونبدأ يا قمرات فى مرحلة البس ودى اهم مرحله اوعى تستعجلى ههههههههه
بعد ما تبسى الكحك كويس جدا جدا ضيفى الماء والخميرة بالتدريج لحد ما يدوب تعرفى تشكليها وبلاش مايه كتير عشان الكحك ما ينشفش منك وينكر السمن
ابدأى فى تشكيل الكحك وبالمنقاش او الشوكة او البصامة بتاعت الكحك مش هاتفرق واتركيه حوالى ساعتين قبل ما تسويه
وبعدها اظبطى الفرن على درجة حرارة هادئه جدا ودى الصورة النهائية بتاعتة طبعا انا
لو كنت اعرف انى هانزل الموضوع كنت صورت الخطوات كاملة سامحونى
المنين بتاعى نفس طريقة الكحك بس السمن لكل كيلو دقيق ربع كيلو سمن + نص كوب زيت ذرة
ويعجن بنفس الطريقة ونضيف الزيت فى الاخر ويشكل حسب الرغبة ويحشى بالبلح المفروم مضاف اليه ملعقتين سمسم وثلاثة ملاعق زيت وقليل جدا فلفل اسود
وهاتسألونى ليه هاقول مش عرفة بس ماما الله يرحمها هى اللى علمتنى كدة
والفرن بتاع المنين يكون اعلى من الكحك يعنى يسوى على درجة حرارة متوسطة
ودى صورة تانية لعيونكم
بسكوت النشادر \\\\\\\\\\\\
المقادير
كيلو دقيق +كوب سمن مرمل ( بس لازم تملى الكوب وهو سايح وبعد ها يوضع فى الثلاجة )
انا فضلت سنتين البسكوت بيفرش منى لحد معرفت السبب وهو انى كنت بعاير السمن مرمل جاهز فكان بيكتر منى
كوبيتين سكر ناعم جدا
10 بيضات بلدى او 7 بيضات كبيرة
2 فانيليا وربع ملعقة صغيرة بكنج بودر
خميرة البسكوت بشتريها من العطار وبقولة للكيلو وبشيل منها نص ملعقة صغيرة
ولو خمسة كيلو بسكوت هاتشترى اربعة وقيقة ونص خميرة بسكوت
الطريقة \\\\\\\\
يضرب السمن مع السكر حتى يصير كالكريمة ثم نضيف البيض المضروب مع الفانيليا
ينخل الدقيق مع خميرة البسكوت مع البكنج بودر ويضاف بالتدريج ويمكن اضافة قليل من اللبن اذا لزم الامر
يشكل با لكيس او ماكينة البسكوت ويخبز فى فرن متوسط الحرارة وبالهنا والشفا
البتيفور
المقادير \\\\\\\
كوبيتين سمن جامد جدا
كوب سكر ناعم ومنخول
2 بيضة
فانيليا
ربع ملعقة صغيرة بكنج بودر
اربع اكواب دقيق
الطريقة \\\\\\\
يضرب السمن جيدا جدا حوالى ربع ساعة ثم نضيف السكر ويضرب حوالى 10 دقائق اخرى حتى يصبح كالكريمة
نضيف البيض والفانيليا والبكنج بودر ويضرب وفى الاخر نضيف الدقيق بالتدريج
وخلى بالك اوعى العجينة تبقى يابسه منك لازم تكون طرية نوعا ما
تشكل بماكينة البتيفور او الكيس حسب الرغبة ودا شكلها النهائى وبالهنا والشفا
الغريبة نفس البيتيفور بس بياض البيض فقط ) )
تسلم الايادى يا بوسى يا قمر
والطبق الحلو دا لصفا الغالية
ودى صورة طبق الكحك والبسكوت بتاعى هدية لصفصوفاتى الحلوين