تخسيس وانتى بتعملى شغل البيت

مافيش وقت، مش فاضية، ورايا حاجات كتير، شغل البيت أهم، لازم أخلّص كل اللي ورايا الأول، وبعدين أفكر في التمارين الرياضية والرشاقة.

كل دي مبررات بتقولها معظم الستات علشان تهرب من عمل التمارين الرياضية البسيطة، اللي هتحافظ من خلالها على جسمها ورشاقتها واللي ممكن بالحاجات البسيطة دي تلحق نفسها قبل فوات الأوان، لحد ما فجأة تلاقي نفسها ماشية في اتجاه العد التنازلي لما لا يحمد عقباه من التخن والسمنة، واللي ممكن يكون سبب في مشاكل صحية وزوجية ونفسية..

المهم يا ستي ماتقلقيش من كل اللي فات ده؛ لأن موضوعنا النهارده هيحل المشكلة دي وهنساعدك علشان تستغلي كل دقيقة بتقضيها في شغل البيت في عمل بعض التمارين الرياضية البسيطة؛ علشان تحافظي على رشاقتك وحيويتك، وفي نفس الوقت تتخلصي من الملل اللي بتحسي بيه وإنتي بتعملي شغل البيت..

أول حاجة هنبدأ بالمطبخ؛ واللي تقريبا كل ست بتقضّي معظم يومها فيه، ودي شوية تمارين ممكن تعمليها وإنتي بتطبخي علشان تحوّلي عملية الطبخ لشيء مسلي ومفيد ليكي..

حطّي أدوات الطبخ بعيد عن إيدك
أول حاجة حطّي الحاجات الضرورية واللي بتستعمليها كل يوم زي الملح والفلفل الأسود والسكر والشاي وأدوات الطبخ في الأرفف العلوية أو في الأرفف السفلية وماتخليهاش في مستوى إيدك.

ولو عايزة تجيبي حاجة من الرفوف العالية، مدّدي جسمك وارفعيه ببطء وإنتي واقفة على أصابع قدميكي، والطريقة دي هتكون مفيدة لتقوية عضلات الساق الخلفية.

ولو عايزة تجيبي حاجة من الرفوف اللي تحت، انزلي بجسمك واثني ركبتك وخدي وضع القرفصاء، بس لازم يكون ظهرك مفرود تماما علشان تحمي العمود الفقرى من الالتواء.

والطريقة دي هتكون مفيدة جدا لتقوية عضلات الساق العلوية وعضلات الفخذ والأرداف وأوتار الركبة.

حاولي إنك تكرري الحركات دي سواء بالانحناء أو التمدد حوالي 5 مرات، وإنتي بتطبخي.

تجنبي الخلاط الكهربائي
استخدمي المضرب السلك وطرق العصر اليدوية، وإنتي بتخفقي بيض أو وإنتي بتعصري الطماطم والفاكهة زي الليمون والبرتقال؛ لأن حركات العصر والخفق دي بتساعد على تقوية عضلات الذراعين.

استخدمي إيديكِ في العجن
لما تكوني بتعملي عجينة استخدمي إيديكِ الاتنين في العجن؛ لأن ده تدريب كويس لعضلات الإيد، وكمان العجينة هتبقى أنعم كل ما تعملي مجهود أكبر في العجن، وكمان هتخسري سعرات حرارية أكتر.
ممكن تعملي تمرين الضغط باستخدام طاولة المطبخ





استغلي الوقت الفاضي وإنتي في المطبخ
في الأوقات اللي بتكوني فيها في المطبخ ومش بتعملي حاجة؛ لأنك مثلا قاعدة مستنية اللبن لما يغلي أو الأرز لما يتشرّب على النار، ممكن تعملي تمارين تدوير لرقبتك وذراعيك، أو تمرين الجري في المكان.

وممكن تعملي تمرين الضغط باستخدام طاولة المطبخ، والطريقة بسيطة جدا، كل اللي عليكي إنك تبعدي عن الطاولة مسافة تقدري فيها إنك تمسكيها بإيديكِ الاتنين.

بعد كده احني جسمك قليلا للأمام، لغاية ما ذقنك تلمس الطاولة، واثبتي على الوضع ده كام ثانية، وادفعي جسمك مرة تانية لورا، وكرّري الحركة دي من 8 : 10 مرات، وطبعا ماتنسيش تنشّفي الأرضية كويس علشان ماتتزحلقيش.

تمرين التوازن.. لجسم ممشوق
حاولي وإنتي بتطبخي تظبّطي توازن جسمك بإنك تقفي على قدم واحدة وترفعي القدم التانية وتثبتي لمدة من 5 : 10 دقائق، وبعدين كرّريها مع القدم التانية، والتمرين ده بيدّي للجسم شكل ممشوق أكتر.

استخدمي أواني أتقل
لما تقطّعي الخضراوات أو اللحوم أو الفاكهة، استخدمي سكاكين تقيلة أو ساطور علشان تدرّبي عضلات الإيدين والذراع والمعصم، وكمان لو ممكن تستخدمي أدوات أتقل زي المقلاة أو الحلل التقيلة؛ لأن ده هيساعدك إنك تحرقي سعرات حرارية أكتر.




ممكن تستغلي وقت المكواة في عمل تمرين لشد عضلات الأرداف





عمل التمارين الرياضية أثناء تنظيف البيت
تمارين للتسخين
أول حاجة تبدئي بالتسخين للعضلات علشان تكون مؤهلة للاستجابة للتمارين، والتسخين ده ممكن تعمليه بإنك تقومي ببعض الأعمال المنزلية البسيطة؛ زي مثلا إنك تلمّي الحاجات المبعثرة من الأرض أو تنفّضي الفرش لمدة 3 : 5 دقائق، وبكده تكوني عملتي تسخين للعضلات والتمارين دي هتخليكي تحسّي بمرونة في العضلات والمفاصل.

تمرين القرفصاء
وانتى بتروّقي أو بترفعي أي حاجة من على الأرض، حاولي إنك تنزلي بجسمك في وضع القرفصاء وتخلي ظهرك مفرود وكعب رجلك ملامس للأرض ومن غير ما تحني ضهرك للأمام؛ وحاولي إنك تكرري الوضع ده على قد ما تقدري؛ لأن ده تمرين كويس أوي للساق والأرداف والفخذين.

تمرين السلم
التمرين ده تقدري تعمليه لما تستخدمي السلم علشان تطلعي عليه مثلا وإنتي بتنظّفي المكتبة أو الدولاب وبترصّي فيهم الحاجات، بإنك تاخدي خطوات صعود ونزول 10 مرات مثلا بتوزّعيها على فترات لحد ما تخلصي التنظيف، مع مراعاة إنك تبدّلي كل مرة برجل وإنتي طالعة ونازلة، والحركة دي هتفيد عضلات الأرداف والفخذين والعضلات الخلفية للساق والجسم كله بشكل عام.




حاولي وإنتي بتستعملي المكنسة الكهربائية إنك تدفعيها للأمام قد ما تقدري





استغلي وقت المكواة.. في تمرين مفيد للأرداف
ستات كتير بتزهق من وقت المكواة، لكن لما تعرفي إنك ممكن تستغلي الوقت ده في عمل تمرين لشد عضلات الأرداف وإعطائها مظهر مشدود وممشوق أكيد هتغيري رأيك.

كل اللي عليكي إنك وإنتي واقفة بتكوي، تبدئي تقبضي عضلات منطقة الأرداف لمدة 10 ثواني وبعد كده انتي واقفة ابدئي اعملي تمرين ضغط للأرداف لمدة 30 ثانية، وبعد كده ارخي العضلات، وكرّري التمرين 10 مرات ده كل بضعة دقائق، وبجد مع المواظبة على التمرين ده هتحسّي بفرق كبير في منطقة الأرداف، بالإضافة إن عملية الكي بتفيد عضلات الذراعين والكتفين.

تنظيف الزجاج.. تمرين لشد عضلات الصدر والذراعين
احرصي وإنتي بتلمّعي المرايات والأسطح الزجاجية، إن حركة إيدك تكون دائرية وفي اتجاه اليمين مثلا، وبتكرري الحركة 10 مرات، وبعد كده تعمليها في اتجاه الشمال وتكرريها برضه 10 مرات.

التمرين ده مفيد جدا لعضلات الذراعين والأكتاف وكمان بيشد عضلات الصدر، ولو تقدري تزوّدي عدد المرات اللي بتعمليه فيها هيكون مفيد أكتر للعضلات، وممكن تعملي نفس التمرين ده وإنتِ بتلمّعي الخشب أو بتنظّفي الحمام.

الكنس.. تمرين بسيط لعضلات الأرداف والظهر
حاولي وإنتي بتستعملي المكنسة الكهربائية إنك تدفعيها للأمام قد ما تقدري، وبعدين ارجعي بيها تاني، وطبعا كل ما هتكون حركة المكنسة أصعب ده هيعمل نتيجة أحسن في التمرين؛ لأن العضلات بتقابل مقاومة أكثر، بس خلّي بالك إنك تشدّي جسمك ببطء وبمرونة علشان يعمل ستريتشينج أفضل للعضلات، وبكده هتعملي تمرين مفيد لعضلات أعلى الظهر والساقين وعضلات الأرداف.


وفي النهاية، لازم تعرفي إن شغل البيت مجرد تمارين بسيطة بتساعدك إنك تحافظي على لياقتك ورشاقتك، وكمان لما تعملي شغل البيت على إنه تمرين هيخلّيكي تعمليه بهمة ونشاط أكتر، وتحسّي إنك مستمتعة وإنتي بتعمليه.

والله تمارين حلوه
ياريت الواحده تمشي عليها فعلا
تسلمي ياقمر

معلومات جامده يامرمر تسلمي ياحبيبتي

ما شاء الله الموضوع الجميل ده جه فى وقته
احسن المسائل كبرت اويييييييييييييييييييييييي ولازم لها تخفيف شويه
تسلمى يا عسوله

شكرا ليك والله عندك حق وانا سعات بقوم انظف البيت كله

من باب اني اتحرك واعمل مجهود

لان الكسل وحش