سؤال فى الحلم

السلام عليكم

اتمنى تكونى بخير حال

من فترة كدة كتبت لحضرتك حلم صحبتى

وهوده الحلم

انا هكتب الحلم عن لسانها
يعنى هى اللى هتحكى
انا حلمت انه كان يوم خطوبة بنت عمى
وانا كنت لبسه فستان وصندل شيك
وليه كعب وانا كنت مرتاحة فى الصندل
وكان لونه ابيض وبعدين قلت انا هروح
الكوافير علشان اشوف بنت عمى
فقالت لى الكوافيرة اقعدى شويه
على ما العروسه تخلص
فجلست وبعدين قمت بصعوبة شويه
وخرجت من الكوافير وبعدين دخلت تانى علشان اشوفها
فقالت لى اقعدى فجلست تانى وبعدين لما جيت اقف
قمت بصعوبه جدا ولكن قمت كنت
بحاول اقوم بايدى وبرجلى وكانى كنت قاعدة على الارض
وبعدين لقيت بنت عمى قامت وكانت حلوة جدا
وانا كنت مستغربة انها خطوبة وكانت الطرحة بيضة
بس كانت حلوة جدا وكان وشها مدور
وبعدين خالتى كانت واقفة جانبى وسالتنى انا قمت بصعوبة ليه
وقالتلى اخلع الصندل لو مش مرتاحه
قلتلها انه مريحنى مع انه اول مره البس صندل بكعب
وقلتلها هما اللى قالولى البسه علشان الفرح
بس كان مريحنى وعاجبنى وخلاص
انا انسه منتقبة ومتدينة
كان لسه متقدملى عريس بش مجاش البيت
لسه وكنت بفكر فى العريس قبل ما انام
انا بنت عمى فى الاصل متزوجة ومعاها بنت صغيرة
وكان وجهها مدور فى الحلم وفى الاصل مطاول
انا وجهى مدور فى الاصل
انا عاوزه اعرف اذا كان صعوبه القيام فى الحلم ليها تفسير ولا لأ
لأنى بجد قلقانه منها
وانا بالفعل متقدم لى عريس

وحضرتك رديتى عليا

انه فى عريس جاى لها

وهتحدث بعض التعقيدات

وفعلا هى شافت العريس وارتاحت معاه جدا والحمد لله

ولكن الموضوع اتفشكل قبل الخطوبه بحاجه بسيطه

بسبب تافه جدا

وهى زعلانه جدا

اما انا بقى فليا سؤال

حضرتك قلتى ان الجلوس فى الحلم له علاقه بالمشاكل

وهى فعلا حصلت

وانا قلت لصحبتى انت قعدتى فى الحلم مره وقمتى بسهوله شويه

وكانت ده اول مشكله وقعتوا فيها

واتحلت على طول

اما المرة التانيه اللى جلستى فيها وقمتى بصعوبه جدا

فهى ده المشكله الكبيره اللى وقعتوا فيها وسبتوا بعض

ولكن ان شاء الله هيرجع تانى لانك لما وقفتى كنت لسه لابسه الصندل مش خلعتيه

السؤال بقى هو كده تفسيرى صح ولا لأ

انا ده اللى حسيته

اتمنى ان يكون تفسيرى صح

لان صحبتى زعلانه جدا

وبتمر بظروف صعبه خالص

ان شاء الله يكون صحيح يا قمر

هو اما يكون نفس العريس او انه عريس تانى هترتاح معاه والله سبحانه اعلى واعلم لكن فى كلتا الحالتين

هو فرج ان شاء الله وارتياح قادم